近排有段《熊仔出院啦》嘅片放咗上YouTube，講醫管局代表「關愛」嘅Icon熊仔要去睇醫生，受到冷暖唔同嘅待遇，第一個版本嘅醫生只望電腦眼尾都唔望吓熊仔，搞到佢好可憐咁喊；另一個版本啲醫護就無微不至，同熊仔探熱都畀玩具佢玩，搞到佢好開心咁出院。YouTube條片冇得留言評論，但有醫護就喺facebook狂鬧。
有醫護喺fb留言，話除咗私家病房，片中無微不至嘅情況嘅機會近乎零。醫管局話條片係想推動關愛文化。八方相信大部份醫護都盡心照顧病人，但家只得5、6分鐘睇個症。公共醫療醫生協會前會長何柏良話，關懷病人好應該，但最好每個症畀足12分鐘，到時醫護都可以好似熊仔咁笑住放工。