求驗客手記:列馬倫、迪亞高都入倒掛 - 求驗客

求驗客手記:列馬倫、迪亞高都入倒掛 - 求驗客

前日睇到貝碧托夫成為64年嚟首位喺雙紅會連中三元嘅紅魔鬼,費Sir梗係笑晒啦!而貝碧第2球倒掛金鈎,睇到我求大俠都有啲血脈沸騰,以前踢過曼聯嘅曉士、恩斯啲倒掛靚波回憶,都突然返晒嚟。講開又講,上個禮拜嘅歐洲聯賽特別多倒掛金鈎世界波,除咗貝碧,今季回流德甲禾夫斯堡嘅迪亞高(圖左二),同喺芬超踢拉迪嘅老牌射手列馬倫(小圖),都有球靚絕嘅倒掛。迪亞高嗰球就勝在第一時間掛射;列馬倫嗰球就同貝碧一樣,背住龍門先用心口控一下,再掛埋去。3球之中,論姿勢分、射門勁度同角度,都係貝碧呢球最堅,我求大俠真係要講個服字。