綠色和平前日喺中環搞咗個踩單車日，小妹都有去趁墟，見到有一款唔似單車嘅單車，個車架好似三角架咁，好鬼死有型，都見有女仔踩，即刻成為焦點。小妹問起先知單車叫做Strida，都好想擁有一部。
小妹噚日踩上去Strida本港總代理G.U.M參觀，老闆香富立（Philip）笑笑口話，Strida原屬英國品牌，1987年由英國人Design，家俾台灣人買起咗。單車設計以簡約及品味為主，三角形車架簡單得嚟又好有Style，作為休閒代步之用，「唔少用家踩出街，甚至踩去買餸，都畀啲路人師奶圍住影」。
方便搭港鐵
Philip話，因為Strida設計簡單，賣點就係摺得好快，3至5秒可以摺合部車，敢講係眾多摺車中，摺得最快。小妹只係從旁睇偷師，都係用咗10秒、8秒就摺到。Philip話，部車摺得快之餘，摺完後可以揸住車頭推入港鐵，唔似其他摺車咁，摺完要托住入閘，手都軟啦，所以Strida幾啱初學者玩，特別啱啲女仔，「我有唔少客係空姐、鋼琴老師等」。Strida單車鏈仲係用皮帶，唔會生銹，夠耐用，又唔使唧油，打理容易又乾淨。
Strida四個型號，最熱賣係最基本嘅LT版（$3,900）；適合細路同女仔嘅Mini版（$4,800）；另有豪華版5.2（$5,900）同變速版（$8,200），「家多咗好多人玩摺車，今年Strida銷量比舊年多咗五成」。查詢電話：21373884；網址： http://www.gum.hk/
電郵：mailto:[email protected]