由劉德華、劉嘉玲同李冰冰主演嘅新片《狄仁傑之通天帝國》最近馬不停蹄喺香港同內地宣傳，前晚一眾演員到北京出席首映禮，着上紅色低胸晚裝嘅嘉玲顯得明艷照人，力壓同場嘅李冰冰。
吩咐保安輕手
雖然兩位女主角都悉心打扮，但係兩女嘅魅力似乎唔及型足幾十年嘅華仔，喺首映期間，有個男粉絲仲一度突破守衞防線衝上台，不過呢名男粉絲嘅目標唔係兩位女主角，反而佢一心只係想同華仔親近，不過現場保安好快手，即刻阻止呢名男粉絲有進一步行動，但係華仔就好親民，仲示意啲保安唔好阻止，男粉絲就順勢熊抱華仔，華仔都大方接受，點知嗰個男粉絲得寸進尺，竟然越攬越肉緊，仲搞到華仔好似俾人鎖喉咁，班保安又即時如臨大敵強行拉開男粉絲，華仔見狀又心痛粉絲受傷，即時細心叮囑保安輕手啲，以免粉絲有損傷。
另外，將於12月舉行紅館個唱嘅華仔，雖然門票仲未正式公開發售，但係15場嘅優先訂飛已經全部爆滿，相信到時又會掀起一股撲飛熱。