80後不停創造傳奇，成功將一個喺火星發生嘅選舉帶返嚟地球。由文學雜誌《字花》編輯鄧小樺、反高鐵時期寫橫額嘅葉浩麟Roland，同保衞過天星嘅蔡芷筠ger組成嘅「八十後文藝青年」，連日嚟熱推藝發局藝術範疇代表推選活動，最終將阿ger送入局，連阿ger自己都覺得好驚奇，承諾日後會用twitter直播開會情況，令牛鬼蛇神無所遁形。
10票之微險勝
今次選舉登記選民7,071人，投票率27%，總投票人數係1,909人。戲曲界嘅阮兆輝再次蟬聯票王，得到1,141票，參加藝術教育界別嘅蔡芷筠得到260票，以10票之微險勝。阿ger同佢嘅助選團當晚睇住點票，又驚奇又興奮，話今次突襲成功，證明80後唔一定次次都係志在參與，唔係餐餐都輸，下個禮拜一會打羽毛球同埋BBQ慶祝。
阿ger自知入局後唔可能擺平所有嘢，但希望成立後援會，裏應外合，將局入面發生嘅事報告出嚟，「好似開會嗰陣我會即時updatetwitter，暴露邊啲人講過咩衰嘢。香港民主一路以嚟出問題，就係因為好多人諗住選咗個人入去就乜都唔理，其實選民都要繼續關注同監察。」佢希望擴大選民基礎，其他本地藝術家更加緊張件事。
連續三個投票日，阿ger都留守票站，估計八成半嚟投票嘅都係長者，結果出嚟有啲界別有成800張白票，「因為阮兆輝好多支持者，好多公公婆婆專程投佢一票，其他人唔識，佢哋咪唔投囉，結果變咗好多白票」。除咗健康十八式之後，新疆維吾爾族雜技團助選代表，都有旅巴載選民投票。
杜琪峯獲連任
阮兆輝旋風下，同佢結盟嘅5名候選人都當選，包括藝術行政界吳壽南、舞蹈界何浩川、文學藝術界蔡益懷、音樂界費明儀同視覺藝術界李錦賢。電影藝術界嘅杜琪峯亦成功連任，任期明年1月1日開始。民政局話今屆總開支約為170萬元，較2001年增兩倍，大部份用嚟宣傳。
至於出選文學界嘅鄧小樺，噚日不停接受訪問，笑言係「落敗後接受最多訪問嘅候選人」，仲有機會直接同藝發局主席馬逢國對話，認真「輸人唔輸陣」。
mailto:[email protected]