車路士前日喺主場大勝黑池4:0，兼英超開季5連勝，威到盡。但隊波嚟緊周末將作客硬撼曼城，車仔領隊安察洛堤（圖）都提醒球員，話對曼城先係今季戰鬥嘅開始。講起戰鬥，原來車仔同曼城兩隊球員都瘋狂迷上Xbox360嘅野戰射擊遊戲《CallOfDuty》系列；車仔球員5場聯賽射入21球，射門技術固然勁，但原來玩射槍遊戲一樣咁掂，當中眼界最好嘅依次係A高、杜奧巴、馬隆達、艾辛同泰利；曼城就以布歷治最準。咁啱布歷治同泰利之前因勾義嫂單嘢搞到喺國家隊有你冇我，不如周六賽前鬥番鋪機，話唔定樂可忘憂，兩個有偈傾番喎！