日本大胃王小林尊專程嚟香港宣傳，有名你叫大胃王，到訪香港梗係同食有關，佢會為無綫收費台兩個節目《覓食四方》同《新派煮意》做嘉賓，噚日佢喺將軍澳同觀眾見面，仲率先畀觀眾見識佢嘅驚人食量，雖然小林尊有好多參賽競食嘅紀錄，但佢真人一啲都唔肥，知道要嚟香港後，仲的起心肝操練腹肌，又係肚皮整咗個無綫收費台logo騷畀大家睇，認真識做。
約定日本相聚
小林尊噚日先欣賞大會安排一個食蛋撻嘅比賽，然後就同安德尊、金剛比拼，大會原定要求各人喺30秒內鬥食得多，點知小林尊好有風度咁讓賽，用30秒只係咁意吞住近20個蛋撻先，仲好鬼儀態咁食，金剛同安德尊搵埋台下嘅人幫拖都唔係佢對手，食飽飽之後小林尊仲有餘慶表演，佢將肚皮放鬆即驚見大肚腩，真係估佢唔到，佢仲話勁食有妙法，就係食嘢時要控制飲水份量。
陳倩揚曾經喺日本留學，可以用流利日文同小林尊溝通，能夠見識對方食嘢嘅勁量令佢嘆為觀止，仲話會同對方交換聯絡方法，方便第日去日本時搵佢相聚，至於對陳志雲事件，陳倩揚話：「冇任何消息，亦冇聽聞公司下令封嘴。」
另外，小林尊噚晚入無綫錄影《超級遊戲獎門人》，同如花李健仁、八両金等人鬥食。楊思琦同麥皓兒喺後台一見小林尊即刻拉住佢影相。小林尊話一次過可以食三件壽司，睇怕如花佢哋幾個夾埋都唔係小林尊對手。