年紀大就愛懷舊，民主黨副主席單仲偕日前就scan咗一批1979年嘅北京照上facebook（圖），當年19歲嘅佢係港大新生，參加學生會搞嘅北京清華大學交流團。除咗首次喺北京留下人生足迹，更加喺旅程中認識同樣係團友嘅發展局局長林鄭月娥以及黨友李永達，三個人確係相識於微時。
單雞憶述當年嘅交通極度不發達，坐火車來回都用咗成三日幾時間；好彩訪問團嘅交流節目都好充實，最難忘當然係同著名文學家冰心對談，以及同《人民日報》前副總編輯王若水會面，成班同學仔都獲益良多。雖然之後都有好多到訪北京嘅機會，但對呢次超過30年前嘅旅程最記憶猶新。