無翅宴會逐漸成為風氣。立法會議員余若薇話，之前光顧一間潮州飯館，落單時講到明唔食魚翅，個夥計都好醒目，「佢即刻就話知道我係環保人士，唔會覺得唔食翅就代表孤寒」。
根據多年同政府官員飯局交流嘅經驗，余大狀覺得政府部門「唔係特別鍾意食魚翅」，但政府又唔肯主動行多步推措施唔食魚翅，佢有一番見解，「政府自我感覺非常良好，覺得自己係（環保）先鋒，喺碳排放等方面都比其他地方做得好」，所以有關魚翅嘅議題往往放埋一邊。
香港護鯊會印製咗近3萬張「請對魚翅說不」明信片，市民可以喺超過150間店舖免費索取，齊齊寄畀環境局局長邱騰華表態，要求政府宴會謝絕魚翅。