好多香港男女都鍾意一得閒就北上揼骨，估唔到「萬人迷」碧咸都係「骨精」，呢位靚佬啱啱俾英國《世界新聞報》嘅狗仔隊拍到佢上禮拜喺洛杉磯，幫襯泰式按摩院。疏肝嘆完「馬殺雞」嘅碧咸果然醒神，連續兩場後備入替都咁好腳頭，上星期六助洛杉磯銀河反勝華盛頓聯隊2:1。
專按大髀背脊
聽講洛杉磯好多泰式按摩院都係色情架步，但碧咸光顧過好幾次嘅呢間叫Lamai嘅泰式按摩院，就堅稱純粹揼骨，絕無另類服務。碧咸呢次就成夜晚九點幾先到場，只係揼咗一個鐘，搭正十點三就走人，連留多陣飲杯茶都唔肯，似乎冇乜鬼祟嘢。幫碧咸揼骨嗰個女技師仲話，碧咸主要叫佢按大髀同背脊，仲提醒佢按足踝嗰陣要特別小心，因為佢之前就係整傷嗰個位，淨係呢點就睇得出碧咸嘆還嘆，但仲好識得保護對搵食腳。
除咗按摩費用40蚊美金（約310港元），碧咸仲畀咗20蚊美金（約155港元）貼士，對幫佢踩背同做其他伸展運動嘅技師嚟講，唔算係咩大豪客。有另一啲報道就話個女技師好享受同碧咸踩背脊，仲大讚碧咸個玉背正到暈。梗係啦，可以同一代萬人迷有咁親密嘅接觸，好多人唔收錢甚至畀番錢佢都制啦！
揼完助銀河反勝
雖然英國傳媒話碧咸趁老婆維多莉亞返咗英國，先走去做泰式按摩，講到佢去偷食咁。不過，睇嚟泰式「馬殺雞」可能真係有啲神奇療效，因為碧咸揼完後嘅上星期六，連續第2場為銀河後備上陣，仲踢咗超過半個鐘，而且狀態越嚟越好，為主場嘅銀河以2:1反勝華盛頓聯隊，兼坐穩美職西岸榜首。銀河教練艾連拿仲好有信心碧咸遲啲喺季後賽可以踢番正選。話唔定碧咸拉隊再去泰式骨場鬆一鬆，銀河今季隨時拎埋總冠軍㖭！