大陸樓價呢幾年越升越癲，好多平民百姓都買唔起樓，但偏偏好多地方都有好多被炒家丟空嘅「吉樓」，為咗嚴正處理「有屋冇人住，有人冇屋住」呢個問題，國務院話要對廣州等五個大城市展開空置房調查打擊炒風，其中一個辦法，就係用黑燈率同水電錶呢啲日常生活嘅數據，嚟證明間屋係咪有人住。
定時開燈冲廁 防查空置房
不過，正所謂「上有政策、下有對策」，為咗應付國家嘅檢查，內地嘅有錢業主就諗到條好橋，避過調查人員嘅法眼，亦締造咗家最火紅嘅新興行業─「守房客」！咁到底「守房客」有咩要做？待遇又係點呢？
根據中資老總報料，佢哋嘅職責，係每日去佢哋老細嘅空置房，定時開燈熄燈、開水喉閂水喉，同埋拉拉水冲吓個馬桶，證明間屋唔係「吉」嘅，係有人住嘅；家守房客嘅市價，係每個空置單位每月有500蚊酬金，而通常一個守房客一晚會做大約20個單位，即係話，每月淨係開燈熄燈冲廁就有成皮嘢!!!唔係講笑，橫計掂計，仲筍過之前鬼佬話請人看住個島嗰份所謂絕世好工！
話時話，神州大地光怪陸離，除咗守房客，仲有好多新興行業，好似賣料畀傳媒同埋比記者更靈通嘅「新聞線人」、專代人講sorry嘅「職業道歉人」，同埋專人買打折商品嘅「職業砍價人」……真係遍地都係機會呢！
李華華
mailto:[email protected]