黃大仙祠噚日舉行大型全真派「皈依冠巾證盟科儀」，簡單嚟講，即係入門道長嘅開學禮。55名入道者披起道袍、戴上道帽，再由主科用清規戒尺扑頭，就正式成為道長，日後可以參加賀誕同科儀等道教活動。
要喺黃大仙祠成為道長並唔容易。舊年招募取錄143人，最後只有55人完成138小時經懺拜儀文化班，學習經文、道樂等，仲要考埋面試同筆試先可以成為道長，入會費先畀3萬蚊，年費600蚊。如果繼續進修，就可升做班衣，修煉落去仲可以做埋法師。
八方問過噚日擔任主科嘅嗇色園主席李耀輝，筆試最難係邊部份，只見佢手上「孔明扇」一揮，就好似睇出八方慧根未到：「我講你都唔明，係道經……讀者唔明叫佢嚟學。」黃大仙重建工程出年完成後，1月9日開幕，之後就全祠開放參拜。