玩住燈籠食住月餅，排排坐賞月，今時今日80、90後會嫌超Out，租船出海乘風破浪，喺波濤洶湧的海面漂吓漂吓，一路漂，個月亮一路追住你，先係賞月最高境界。今日教你醒避船P陷阱之餘，仲有蘋果讀者$60出海至筍優惠。
記者：徐影龍
攝影：陳陶鈞
Model：Rika、Hazel@GMEModels
入秋可玩水上活動
說穿了，中秋賞月只不過係一個藉口，讓大家盡情狂歡一番，呢個時候仲要上山點蠟燭、攤開塊布出住汗食月餅，年輕男女肯定受不了。租船出海開P釣墨魚，當然唔係新鮮事，拜全球暖化所賜，入秋後仍然熱到有廿幾三十度，中秋出海大可撈埋水上活動嚟玩。聽銀禧遊艇Tiffany姐姐講，近期大熱唔再係香蕉船同水泡，最受後生仔歡迎嘅首推Wakeboard同三人飛毯。好似我咁偏向文靜嘅，日頭釣魚游水，再嘆住支紅酒欣賞鹹蛋黃日落西山，再望住比堅尼美女同嬌媚滿月，「兩團圓」意境自當心領神會。
半價租遊艇
以銀禧遊艇租船為例，一般35人艇閒日約租$3,000，蘋果讀者仲着數，首10位登記人士，只需$1,500便可租用25人艇8小時（中或西式艇），除開人頭計只係$60位，仲要包晒船主、燃油及冲身費用，平過你搭港鐵過金鐘再截的士上山頂。最重要係自攜食物或同佢哋預訂都得，絕無半點附加費用。
隱藏收費 冲身都要錢
正所謂「魔鬼在細節」，Tiffany話租船勁多屈錢陷阱，只識格價貪平好易出事，「首先最重要係保險，能低價出租遊艇，大多係減省成本，發生意外先知無得賠，喊都無謂。」出海無保險，就如包下家十二章自摸一樣，極危！「另外平價租船，慣常有大堆附加費等你踩，好似帶寵物收$200一隻，淡水冲身$10位，仲有麻雀啤牌逐樣同你計，飲大兩杯要嘔記住向海，否則船公司隨時可屈你$1,000至$3,000清理費！」咁多附加費，租艇時真係要問清問楚先得。
除小心隱藏收費，Tiffany亦提醒大家，揀選出海目的地都好重要：「白臘、大浪西灣等較遠水域，的確水清沙幼同好靚，不過係網絡盲點，手機訊號極弱甚至收唔到，正所謂有乜事都求救無門，我就唔多建議喇！」
查詢：35555555（銀禧遊艇）