秋風起，啲皮膚乾乾哋，都要做多啲facial，小妹同皇冠假日酒店靚女公關Iris傾開，佢話酒店餐廳Kudos見秋凉，即日起到下月17日推出以三文魚為主題嘅自助餐，因為三文魚含豐富蛋白質同奧米茄3不飽和脂肪酸，食多啲，皮膚都靚啲。
玩猜產地有獎遊戲
酒店自助餐一定會有三文魚食，Kudos有三文魚食，又有乜嘢特別噃。Iris解釋話大多酒店都係提供挪威三文魚，Kudos今次搜羅挪威、蘇格蘭、愛爾蘭及澳洲四種三文魚，其中愛爾蘭三文魚仲係有機嘅㖭，「雖然大家都係三文魚，食落口味道同口感都唔同，真係要食過比較先知o架」。
小妹起錨去Kudos唔落醬油試食四款三文魚，最鍾意澳洲同有機愛爾蘭，前者一啖咬落去肉質好嫩；後者味道比澳洲嘅淡啲，入口甘香。挪威味道夠濃，蘇格蘭肉質較爽。Iris笑笑口話，自助晚餐時段仲會有猜三文魚遊戲，試食後猜中所屬產地就會有獎。
自助餐除咗有三文魚刺身，仲有越式三文魚米卷，有機愛爾蘭三文魚燕窩沙律、四川燉三文魚、金華火腿伴白花三文魚卷、三文魚蟹子炒飯等。自助午餐同晚餐收費成人每位$178起及$298起。查詢39803000。
鍾意生蠔嘅老饕，可以考慮南灣海景酒店，公關老友David同小妹報料話，佢話搵咗南澳洲嘅名廚Tony主理全新嘅海鮮自助晚餐，品嚐南澳有名、秋天當造嘅CoffinBay生蠔、鮑魚、皇后魚、皇帝蝦等。家做緊75折，折咗成人$299起，查詢39688833。
電郵：mailto:[email protected]