甄子丹再強也要時勢造就，以《葉問》打日本人揚名，今日再在新片《精武風雲．陳真》中打得更狠，一對雙截棍橫掃過百日本人，氣勢強過葉問「一個打十個」，加上釣魚台事件，愛國憤青自然看得熱血沸騰。嫌打唔夠喉，子丹再來個背面全裸露股，證明世上沒有最強只有更強。不過打贏好、打輸好，釣魚台都是中國人的地方，中國人不是東亞病夫！
撰文：何永寧
陳真一個子虛烏有的角色，38年前由作家倪匡創作，在李小龍主演的電影《精武門》中登場，料不到片中大打日本人令這位虛構人物搖身成為民族英雄。今趟甄子丹在劉偉強執導的新片《精武風雲．陳真》中再演當年偶像的角色，他自言有一番使命感，子丹日前接受訪問說：「其實15年前喺電視劇都拍過，不過感覺好唔同。今次拍電影，覺得係對偶像嘅一種致敬，因為當年李小龍拍嘅都係電影。」
向偶像李小龍致敬
子丹認為無論陳真這位人物存在與否，代表的都是一種精神：「佢代表嘅係一種民族氣節，中國人嘅尊嚴同熱血，好似啲人會覺得Rambo好代表美國人。自己心目中嘅陳真其實就係李小龍本人。」他自言當年偶像演繹陳真的每一個舉動已經深入人心，今趟要延續前作，必須加入新元素，作為向偶像致敬，所以片中的天山黑俠造型，大有李小龍在電視劇《青蜂俠》中的家藤一角影子，由黑面罩到中山服衣着亦然。
當年血洗虹口道場中李小龍的武器雙截棍，在今趟結尾也一再出現以一敵百，子丹說：「我唔介意啲人話我似李小龍，因為係事實，每樣都係我對佢要逐一致敬嘅地方。」
慘被虐打血肉模糊
不過論到比偶像過之而無不及的，要數子丹在片中被日本人俘虜的一幕。他不但被虐打到血肉模糊，更在鏡頭前脫得清光，幾個背部全裸的鏡頭，將他一身橫練的背肌和股肌表露無遺，看過試片的無不嘩然驚嘆這位宇宙最強的身材，更以為是替身代拍，直至近鏡才赫然發現真的是子丹本人。
嫌替身肥親自上陣
回想那時一絲不掛拍攝，子丹仍然津津樂道：「其實導演劉偉強都有安排替身畀我，不過喺片場見到佢咁肥，所以都係自己上陣好過，因為要向偶像致敬梗係要將力與量表現出嚟，冇理由一嚿豬肉咁o架。」他笑言為展現最強一面，刻意操靚線條，他笑說：「我同劉偉強講，點拍都得，唔好影前面，費事你出唔到街。」
劉偉強慢工保金漆招牌
回想當年，劉偉強一年內可以完成五部《古惑仔》式的港產片，連拍帶上。今時今日一部《精武風雲．陳真》一拍就半年，還未計後期製作時間，所以一年頂多只有兩套作品，他說：「一部《古惑仔》拍一個月多啲，呢頭拍完嗰頭就去做後期，都係做一個星期就可以上。家唔計籌備，呢套《陳真》淨係拍都半年，未計後期做咗半年。」
市場蓬勃多枯枝
自言時移世易，10年前鄭伊健和郭富城的《風雲》內地票房有500萬已經開心到不得了，現在票房就算過億卻只有驚沒有喜。戲拍少了錢卻沒有搵少，但時勢同時造就一班渾水摸魚的人，香港市場如是，內地亦然，劉偉強笑說：「唔使擔心，因為已經發生緊，錢人人想搵。以前80、90年代香港電影全盛時期，你攞支筆係咁易寫個戲名，話有劉德華同張曼玉，咁就有老細畀錢你開戲，今日內地都差唔多係咁。」
涉政治或助票房
劉偉強表示內地的餅越來越大，分食的人也隨之增加，作為自保唯一可以做的就是保住金漆招牌，他說：「我有乜嘢權阻止人去拍，惟有自己做好啲，唔係使乜做半年後期搞咁多嘢，投資大咗要花嘅前後期工作多咗係事實。」
今趟不再行蠱惑、玩卧底，《精》片轉講民族尊嚴。撞着釣魚台事件，電影安排在918事變紀念日之後上映，一切精心計算，加上片中陳真大打日本人的情節，自必牽動不少人情緒，憤青一族自然看得更心曠神怡。不過，涉及到政治層面，劉偉強就變得有點謹慎，他說：「對票房有冇幫助就唔敢講，不過好多都話有。」
劉偉強自言打日本人場面不是刻意營造，純粹是延續38年前李小龍《精武門》的故事，他說：「今趟係向李小龍致敬，延續嗰時未完嘅故事，所以打日本人都順理成章。其實當年有一幕李小龍見到寫住『華人與狗不得內進』個牌後打外國人都係咁加上去，情緒要牽動至有電影效果，唔係太刻意就可以。」
故事簡介：血洗虹口道場
《精武風雲》故事講述陳真（甄子丹飾）當年為報師傅霍元甲被毒殺之仇，獨闖虹口道場，擊殺一眾日本武術高手，轟動全上海後便人間蒸發。
戀神秘交際花
7年後，陳真化身年輕實業家從歐洲回到上海，潛入卡卡夜總會，與老闆屠爺（黃秋生飾）合作探聽日軍情報，當中出身神秘的交際花KiKi（舒淇飾）出現，陳真更與她發展一段似有還無的愛情，令情況更撲朔迷離。
其間不少反日志士被日本暗殺集團殺害，陳真化身天山黑俠反擊，可惜一班戰友不幸為日本人所捉，被帶到日本情報機關虹口道場。這趟陳真再次獨闖舊地，重現當年血洗一幕。
