入到東京遊戲展，除咗試玩最新3D同體感遊戲外，最搶眼焦點必然係Capcom展位，尤其係各位芒亨Fans更可能似曾相識，事關Capcom將原本在遊戲內嘅芒亨村搬到會場，俾人即場試玩最新嘅《MHP3rd》。
記者、攝影：許福合
《MHP3rd》新狩獵點
主機：PSP 推出日期：2010年10月
其實就算唔提咁有心思嘅展位設計，淨係睇Capcom公佈嘅作品名單，Capcom展位都定必要一到。而重頭戲當然係《MHP3rd》，上集《MHP2nd》無論在日本或香港，都係超熱門大作，《MHP3rd》作為正統嘅續篇，自然更多玩家期待。展場設計使用咗遊戲內芒亨村嘅佈置格局，機迷入去一定唔怕迷路。雖然係咁熱門，都不用花太長時間排隊試玩，一般5-10分鐘即可進場，事關村內有數十張枱，而每枱都係設計成讓玩家圍埋連線四打對戰。已接近推出時間，所以完成度好高，連線對戰過程都好順暢，玩家可以試玩到新嘅優克摩村狩獵點，怪獸設計更加兇猛，擔心唔識出招？唔緊要，旁邊就放咗出招表，即學即玩！
2nd玩家下載試玩版
好想試吓，又未有機會去TGS？原來香港Capcom在計劃讓2nd玩家免費經PSN下載《MHP3rd》試玩版，玩家只要憑2nd說明書一角，證明擁有《MHP2nd》遊戲，就可免費獲得下載序號，10月就有得玩，詳情就留待Capcom稍後公佈。
《Marvelvs.Capcom3》現場格鬥
主機：PS3/XBOX360 推出日期：預定2011年
好多玩家期待嘅《Marvelvs.Capcom3:FateofTwoWorlds》，會場同樣設置有大量試玩台，而且不用排隊。試玩過新角色Dormammu，覺得能力好強，不過連招並唔易出，要花啲時間練習。
玩評矚目Game
微軟：《RiseofNightmares》
主機：XBOX360 推出日期：預定2011年
XBOX360力谷Kinect，新公佈有5款Kinect體感遊戲，我就比較有興趣SEGA《RiseofNightmares》，現場示範咗雙人模式，利用體感操作，好似變身成超音鼠一樣。
Konami：《惡魔城：闇影主宰》
主機：PS3/XBOX360 推出日期：2010年10月
名製作人小島秀夫亦有出現TGS，不過唔係宣傳《MetalGearSolid》，而係佢嘅新作《惡魔城：闇影主宰》，論畫面質素絕對拍得住《MetalGearSolid》，加上《惡魔城》係Konami重頭戲之一，值得期待。
SEGA：《人中之龍終章》
主機：PS3 推出日期：未定
《人中之龍》係PS3大作，新作《人中之龍終章》是否最後一集就唔知，現場可試玩到東京神室町嘅場景，並且可以見到層出不窮嘅殭屍，不過開始變得有BioHazardFeel。
Konami：《DanceEvolution》
主機：XBOX360 推出日期：2010年11月20日
KonamiDDR都算係跳舞遊戲始祖，新作《DanceEvolution》會使用XBOX360Kinect體感操作，可以同時兩個人齊跳舞，相比較早公佈嘅《DanceCentral》，《DanceEvolution》畫面同效果都靚得多。
NAMCOBANDAI：《高達無雙3》
主機：PS3/XBOX360 推出日期：2010年第4季
上一集《高達無雙2》評價都算唔錯，所以第3集亦都幾期待，試玩時發現機體已經包括《機動戰士00》及《UC》系列，留意到加入唔少光影效果，雖然畫面感覺有啲花，但仍不失無雙風格。
搵靚女
