教育局要中學自願縮班，避免殺校震盪，當然合乎教協教聯嘅要求。股票Ｔ位公子剛啱入學讀K1，有排都未到升中學階段，已經驚定先，恐怕他日名校冇位收佢個仔。分析Ｗ個乖仔出年四歲，就表示未驚過，佢以分析師口吻講：「○六年以後香港出生嬰兒數目增加得好快，已恢復舊觀，到我個仔讀中學嘅時候，學校要擴班o架嘞，呢幾年來港生仔女嘅內地人之中，唔少已在香港買晒樓，香港有十二年免費教育，每年唔駛向教師送一萬幾千元禮券，幾好呀，他日小學、中學生數字一定回升！」
不過似股票喎，回升之前就向下一沉，先殺好友再殺淡友，啲普通學校唔知有冇抗跌能力，避過一劫呢？資深教育記者Ａ就話：「現時中學分三大類，一是直資學校，不受殺校縮班所影響；二是著名英中，穩坐釣魚船，學生多到收唔切，抗拒縮班；三是普通中校，唔高唔低，最為危險。譬如灣仔有間富豪飯堂Ｆ記，同街有間食肆叫Ｍ記，孫公就係想Ｆ記每日開少幾張枱，希望一啲食客去Ｆ記搵唔到枱就自動走去Ｍ記，否則嘅話，一間Ｆ記爆晒棚，一間Ｍ記拍烏蠅，Ｍ記啲廚師、侍應要統統炒魷o架嘞。」
孫公可能係好心，特登要照顧Ｍ記，但如果Ｍ記嘅廚房真係唔掂，Ｆ記嘅食客點解要走過去幫襯呀？記者Ａ話：「同區得兩間，冇得揀，唔制就走去中環間直資Ｙ記啦！」
左丁山想知道，如果英中名校堅決不願自動縮班，政府究竟可以有乜絕招逼名校就範？記者Ａ講：「唏，到時正合政府之意，殺校之責任不在官方，只係同行自相廝殺，弱者離場啫，張文光唔好鬧呀！」哦，明白些少嘞，苦口婆心力推自願縮班，乃知其未必可為而為之，聽講仲加埋利誘，自願縮班者有額外撥款，情至義盡嘞啩。資深記者Ａ又話：「政府唔敢逼喇沙呢類名校縮班嘅，重災區沙田大埔北區啲英中就難講。」面對學童人數日減嘅大局，教師真不易為，一啲學校要教師在晚上去尖沙咀「執仔」，苦勸佢地入學，如此搵「客」，乃大城一景。