惠英紅（小紅）憑電影《心魔》先後奪得多個電影的最佳女配角及影后殊榮，今次更威到去俄羅斯。
後悔冇親身攞獎
惠英紅前日再以此片榮獲海參崴國際電影節最佳女演員，絕不遜色於張家輝，以同一個角色多次得獎。
小紅昨日在九龍灣出席「電影專業培訓2010」開學禮活動時，坦言為未有親身到俄羅斯領獎而感到遺憾，她說：「以為係外國人嘅影展，自己冇乜機會，真係好後悔冇去，本來噚日聽到《心魔》唔可以參加大陸個金雞百花爭獎，只可以做觀摩公開放映，好upsad，但聽到自己又攞獎，即刻開心番晒，不過我並唔係想破乜嘢紀錄，但得獎對演員嚟講係好大鼓勵，我一直都堅守原則，將每個鏡頭都做到最好，盡我所能做到最完善，入行咁多年，最難過係由後生到家呢個年紀嘅中間界別，好多藝人都接受唔到，我終於捱過去，之後就海闊天空。」
採訪、攝影：魯萍