同事阿清噚日走埋嚟我個位度，見到元寶蠟燭香，以為我因為公司鬧鬼，所以要拜吓。我話係用嚟請佢食，佢啋過我。其實呢啲都係今年海洋公園哈囉喂（9月23日至10月31日）新推嘅「靈食」，「有燭食燭」（$43）成對蠟燭咁，阿媽隨時攞錯去拜神，但其實似放大百力滋咁，仲係紅莓糖心。「燒香解餓糖心大香」都好似香。
幾款曲奇好搞鬼，「烘金寶」元寶曲奇（$49）用紙元寶包住曲奇，通吃銀行「口張來錢」（$32）仲誇，成塊餅好似冥鈔，靈界朋友都隨時收錯「假鈔」。公園高級銷售經理Shirley話年輕人最百無禁忌，送禮自用都得。
今年另一新作係「護身符」，「有啲女仔想嚟玩又驚，仲嚇到喊」。佢話嘩鬼會周圍嚇人，但掛咗呢道符，啲鬼就唔會嚇你。「但如果隻鬼喺後面睇唔到道符，可能照嚇你o架」。吓！咁咪要前前後後掛多幾道？佢又話今年多咗頭飾，專俾尤其女仔喺入園前打扮吓，明顯係走cutie路線，唔嚇人。
Shirley話萬聖節銷量會比舊年多30%，仲透露2013年園內小店會由14間店增加到24間，仲會有高檔次產品，滿足遊客購物欲。
推萬聖節應節食品
餐飲方面，就有魔豆血池特飲、棺材熱狗等，加$15仲會送個閃光杯㖭。餐飲部營運經理Stephen話，喺正門嘅西式、日式高級餐廳「海龍皇」年底開張，旁邊就係一個超巨型水族缸「海洋奇觀」，一邊食一邊睇魚，餐廳只有小量海鮮供應，而且都係可持續海鮮，唔會影響環境。Shirley話，2005年起海洋公園攞番餐飲自己搞，唔再外判，有關收入比例由13%升至38%，希望擴建後升到60%㖭。
電郵：mailto:[email protected]