「廿蚊張」張宇人噚日否認自己將辭去自由黨副主席一職，同時否認自己講過最低工資可訂於20元水平，話「我根本從來都冇講過」。張宇人又話，自從有人傳佢會辭任副主席後，就不斷收到黨友電話挽留，直到噚日仲收緊電話。
講到興起，張宇人仲公開否認喺城市論壇講過「廿蚊論」，話事件源起只因答記者一條問題，加埋同場其他黨派借勢抹黑自由黨所致。
張宇人又話，參加得區選嘅黨員，主要靠個人實力，唔係靠個黨，所以唔信佢過去最低工資嘅言論會累死個黨，但就講明自由黨一直備有豁免投票機制，佢唔排除嚟緊為捍衞最低工資唔多過24蚊，會向黨申請豁免。