台北市忠孝東路四段一帶，日夜街上都會有唔少型男索女，除咗因為嗰度有間台北好出名的夜店外，其實亦係潮服店林立之地，當中包括陳冠希有份開設的Juice，都在此分一杯羮。原來天氣女郎Mini唔止愛美食，仲愛陳冠希……的潮服。
闖入陳冠希……潮店
曾幾何時好多朋友都問，點解睇台劇啲男女主角着衫型到震，但當自己在台北旅遊時，偏偏搵唔到呢類產品，部份夜市的服飾仲老土到不堪。其實係因為我哋搵錯地方，今次壹電視WeatherGirls的Mini就話畀大家知，台北潮服集中地就在交通最方便的忠孝東路。
其實潮服店集中在忠孝東路旁的後巷，從神旺大飯店往對面的小巷走，便開始發現不少服裝店，包括Edison陳冠希所開設的Juice。呢間店係Edison繼吉隆坡、上海等地之後，於去年年底新開的潮服店，唔少港台和大陸年輕人都慕名而來。講真，呢間舖位於內街，唔係Mini帶路我都唔識去。見到門口，個嘜頭真係同香港店一樣，有大大隻嘅「潮熊」。
查實香港都有佢嘅服裝店，為咩走到去台北咁遠掃貨？據公關所講，除了因為今年秋冬新裝已經上架之外，有部份貨品真係台北獨有，好似呢件夏日特飲Tee，就係台灣先有嘅設計。至於現時感情空白的Mini就話，以前喜歡買Juice的恤衫送男朋友，着上身特別有型。
A.JuiceTaipeiStore
地址：台北市大安區敦化南路161巷一段38號
電話：（886）02-27513227
次文化陀槍Ball后
查實台灣着住前衞服裝的年輕人通街都係，大膽講句小記認為係僅次於日本。喺Juice附近，亦有一間專賣由兩位獨立設計師Joe和街頭藝術家DBSK1所設計的服裝和飾物店。店子以八十年代為作品風格，表達出花巧、誇張、超鮮艷色彩的次文化。
好似Mini手上件連身黑紗裙，除咗係透視裝同可以雙面穿着之外，胸前還有兩個唇印，着咗上身真係成個LadyGaga咁，誇張到震！但呢度試穿嘅人多，能夠Fit其style的人少。其實呢間店經營四年，中間都搬過三次，最初喺人流暢旺的西門町開店，最後落戶較為偏僻的小巷重新開始。
B.AMPMStudio
地址：台北市大安區忠孝東路四段205巷26弄5號1樓C店
電話：（886）02-27110581
孫芸芸「真胸」鏈
除了潮人陳冠希帶領潮服文化之外，台灣正妹仲好喜歡追隨名媛的服飾，好似台灣名媛孫芸芸，佢喺Ball場的服裝，都係各位正妹Copy的目標。正因為咁，孫芸芸藉住自己的名氣開設Dazzling公司，除咗喺飲食界有吐司店外，仲有代理埋飾物系列同女裝鞋㖭。
距離忠孝東路四段約15分鐘腳程的微風廣場地下層，係孫芸芸其中兩間鞋店和飾物店的所在地，夠晒集中。而微風廣場的周年慶大減價開始得算早，由9月23號到10月11號，全面貨品八五折，部份更低至六一折左右。
C.微風廣場
地址：台北市松山區復興南路一段39號地下
電話：（886）02-66068855
去Clubbing打保齡
各位台灣正妹扮得靚靚之後，當然要去大show本錢啦！台北的夜店有很多，一般都泛指Clubbing或唱K，最近夜場又多咗間新貴，就近信義區誠品書店開咗間全新夜店——Strike。剛剛正在試業，入面除了飲酒同跳舞外，仲有一張桌球枱以及六條保齡球球道。無錯，係去Clubbing打保齡！
一般夜店都只係開星期三、五、六，而Strike就一星期開足七日，但除咗三、五、六係勁歌跳舞場外，其餘日子係以Lounge形式開放！不過訂座包廂及訂保齡球道收費不同，一條保齡球道的消費最少$4,866，貴包廂一半。由於家係試業初期，人流不多，據講有唔少台灣藝人幫襯，小記採訪當晚就遇到Vanness吳建豪。
D.Strike
地址：台北市大安區忠孝東路四段563號B1
溫馨提示
雖然台北於每年的10月左右，各大公司都會舉行周年慶活動，但並非每家公司的周年慶都會大減價，好似Bellavita於今年就沒有減價活動，大家最好因應自己的購物需要而計劃行程。
TravelMemo
持特區護照或BNO及於香港出生的持有人，可於網上免費辦理入台證，落地簽證需付$73。中華旅行社：2530-1187
港龍航空香港台灣來回機票價錢由$1,720起。港龍航空： http://www.dragonair.com
1港元兌4.08新台幣（文中價錢已折算港元）
110V，兩扁腳插座