今年係九廣鐵路九龍至羅湖段通車100周年，已經合併咗嘅港鐵為咗慶祝呢個大日子，特別送咗樣嘢畀政府，就係當年放喺尖沙嘴鐘樓裏面嘅銅鐘嘞。呢個銅鐘由英國製造，有成噸半重，90年前運抵香港，1921年開始喺鐘樓使用，直至日佔時期停用，到50年正式退役。去到七十年代，銅鐘先後喺紅磡火車站、九鐵沙田總辦事處同火炭鐵路大樓公開展示。
難得政府唔嫌港鐵「送鐘」，將佢重置喺鐘樓地下，仲用嚿路軌做嘅枕木墊起佢。市民如果想睇吓個鐘，就要趁今日同聽日，朝十晚六嘅開放時段過去，因為之後鐘樓關閉，市民就只可以喺玻璃窗外窺看。九鐵解釋話，鐘樓近海，唔做好防護措施，個鐘好易生銹喎。