活樂遊1：ShareEverythingwith　天氣女郎Mini

早排小記到台北嘆世界之時，竟然遇上三個颱風夾攻台灣，心諗今次實無得戶外活動啦！仲要約咗台灣壹電視天氣女郎之一Mini，帶我去試吓不一樣的台北。遇到佢之時，竟然天晴曬到震，Mini唔通可以呼風喚雨？

文、攝：蕭漢祥
鳴謝：港龍航空

芒果蜜瓜香蕉圍埋身

台灣壹電視啟播咗個多月，除咗對新聞同娛樂節目好評如潮外，連報天氣都非常矚目。今次去台北專登搵嚟天氣女郎之一、隊長Mini林怡慧，就帶我去台北101附近，去年開幕的商場Bellavita。歐陸色彩的商場，裏面統統都係一線商店，當中位於4樓的Haleakala，夏威夷菜就係Mini今期嘅推介。咦！日本菜、泰菜、越菜、意大利菜就食得多，夏威夷係乜呢？Mini話夏威夷盛產水果，因此菜式都係以水果為配菜，如Mini首部曲，頭盤的熏雞肉鮮蝦水果優格沙律，就用上士多啤梨、奇異果、柚等，配以鮮蝦及已經切好一小片的熏雞肉，味道清爽開胃，有別於一般的沙律。
Mini二部曲，就係介紹主菜炸酪梨鮭魚佐蟹肉蘑菇醬汁，和小食脆炸軟殼蟹酪梨米紙卷，好似西方菜及泰國菜，配料有熱帶水果酪梨，真係借題發揮。軟殼蟹炸得剛好脆口，米紙卷厚薄適中，再加上酸汁真係非常美味，一碟四件的米紙卷，Mini極速消滅咗三件，真係信心的保證。主菜的三文魚，配上蘑菇醬汁，醬汁再混入蟹肉一併烹調，食落有海鮮大雜燴感覺。整個Set加埋要近$380一位。高級地方，算係咁。

■脆炸軟殼蟹酪梨米紙卷$68/份。

■炸酪梨鮭魚佐蟹肉蘑菇醬汁$110/份。

■香草奶酪佐野莓醬、熱帶水果雪波$54/份。

■夏威夷菜主要食水果，但Mini最愛都是甜品。

■Haleakala是餐廳也是酒吧，三五知己飲酒閒談絕佳地點。

A.Haleakala

地址：台北市信義區松仁路28號4F
電話：（886）02-87292868

朱古力小籠包

點解台灣夜市咁流行？查實都不外乎個貪字，要一個地點嚐盡各式美食。但對於Bellavita嚟講，要引入這個概念並不容易，因為一個頂級品牌滙聚的商場，設計得唔好隨時會變成平價FoodCourt，影響整體形象。
設於地庫的WeShareEverything，餐廳設計以歐陸建築為主，中央位置是麪包店、餅店等，反而飲食區就設於地庫外圈位置。沒有四周空洞的感覺，不似FoodCourt，食物都沒有太平民化，Mini點了和式定食及上海小籠包。前者刺身和壽司非常新鮮，天婦羅炸得恰到好處；後者除了傳統小籠包之外，還有朱古力小籠包，就是以朱古力作為小籠包餡，小記食落口之後即時嚇呆，真的非常有創意。

■WeShareEverything，顧客可以點選地庫層各國風味菜，感覺不像FoodCourt。

B.WeshareEverything（Bellavita）

地址：台北市信義區松仁路28號B2
電話：（886）02-87292700

等減價珠仔Mini包

由9月中至10月，台北不少商店均會舉行周年慶活動，以大減價回饋顧客的支持，部份產品的減價幅度達四折，所以呢個時候都有唔少港人專程去台北掃貨。
Mini今次介紹的Bagmania，店名有如Mini對手袋的熱愛程度一樣「為包包瘋狂」。該店代理不同國家品牌的手袋，當中以日籍設計師澤村貴之的品牌BagieBoogie最受歡迎，其手帶以珠珠設計令不少女士一見鍾情，當然包括Mini在內。她說：「我最愛就是羊皮製紫色的包包，袋身質感柔軟，加上大大粒珠的手帶，夠晒突出兼Lady！」Mini即時向同行的台灣導演大發冧功，希望送她一個手袋，好彩導演見慣大場面把持得住。或者可能導演希望等周年慶的時候，先至買個手袋畀Mini，話晒平啲嘛！Bagmania於10月15日開始舉行周年慶，有貨品以最低價的七八折出售。為咗慳家的Mini，惟有等多一個月啦！