【志雲難局之親疏有別】無綫總經理陳志雲及其愛將叢培崑前日被廉政公署正式落案起訴，二人與無綫藝人寧進關係千絲萬縷，上月獲撤銷擔保甩難的寧進連日來力撐陳志雲，更透露有意大後天到法庭聽審，以示精神上支持陳志雲。但提到小學同窗叢培崑，寧進即說「不願置評」，言語間暗示二人因財失義。
無綫總經理陳志雲、其愛將叢培崑及無綫另一高層陳永孫，前日被廉政公署正式落案起訴，無綫藝人寧進今年3月也被捲入涉貪案，但上月中獲廉署撤銷擔保，率先甩難，他連日來開腔力撐密友陳志雲，更暗示陳志雲可能信錯人，但對叢培崑卻稱「不願置評」。不過近日隆胸成功的莊思敏卻唱反調，聲言深信叢培崑是好人。
「我知佢心情唔好」
寧進與叢培崑識於微時，二人是小學同學，寧進更做中間人介紹叢培崑認識陳志雲，早年二人又於思潮廣告有限公司共事，但寧進去年8月已辭去思潮董事職位。昨日寧進接受電話訪問時，只直言擔心陳志雲，他說：「我知佢心情唔好。」
寧進又透露有意大後天到法庭聽審，以示對陳志雲精神支持，他說：「但我又怕會阻住，唔知會唔會唔方便，我會諮詢佢。」提到叢培崑為人時，寧進不屑地說：「不願置評。」可是因財失義？他只答：「總之有問題。」
另一方面，莊思敏昨日直認過去曾出席叢培崑搞的宣傳活動，又指與叢培崑及陳志雲均稔熟，今年3月爆出涉貪案後，更曾分別相約叢培崑和陳志雲吃飯，她說：「大約個幾月前，我分別同阿Ed（叢英文名Edthancy簡稱）同Stephen（陳志雲）都有食過飯，大家都冇講案件啲嘢。我依然深信佢哋係好人，唔信佢哋會做犯法嘅事，我都唔覺得思潮有呃過我。」
叢培崑開心遊美國
莊思敏更謂大前日、即廉署正式起訴前一天，曾跟叢培崑通電話，當時叢培崑心情輕鬆，她說：「阿Ed仲話啱啱去完美國旅行咗兩、三個禮拜，佢仲話好開心。」她表示現階段要給予好友精神支持。
採訪：比華利
全城熱話：無綫藝員惶恐慎言
無綫總經理陳志雲前日被廉署正式起訴，TVB旗下小生花旦均十分關注事件。
陳法拉：件事已經進入司法程序，我冇嘢回應。
黃宗澤：我係有參加澳門舉行嘅歌星賀台慶，但唔清楚中間內情，所以唔知點講。
徐子珊：如果廉署要我協助調查，我都會配合，但家未有人搵我。
陳豪：同佢之前冇乜嘢合作機會，都冇人同我講過要封口，睇到新聞後覺得好唔開心，希望佢盡快度過。我冇聯絡過佢，家自己心情係心噏多過擔心，佢係一個好有本事嘅人。
薛家燕：個心好唔舒服，唔想發生嘅事發生咗。Stephen（陳志雲）唔似係睇錢咁重嘅人，我成日請佢做義工同講座，好多時佢都係義工身份。希望件事快啲搞清楚，唔知當中會唔會有搞錯成份。我有send過短訊問候佢，但佢就冇覆。
杜琪峯：終於有人問我避唔到，家進入司法程序，唔應該講佢有冇錯，咁對佢唔公平。之前有人話我話佢係騎呢怪，我其實唔係咁意思，我喺電視台做咗20年先離開，知道電視台係整體機器，唔可以有機器太突出，但少少就可以。