廉政公署前日正式起訴無綫總經理陳志雲，指他涉嫌串同前助手叢培崑詐騙佘詩曼和楊思琦等五個無綫花旦騷錢，據悉黎耀祥和葉翠翠也將被傳召出庭作供，二人昨日現身將軍澳電視廣播城時，異口同聲表示尚未接到出庭通知。
「陳生係叻人」
祥仔與五花旦今年2月一同出席涉案的「MaBelle呈獻：志雲情人節首選」新書記者會，他過去也接過不少叢培崑安排的活動。祥仔昨日說：「涉及有啲活動我唔方便講太多，會誤導或偏差，會對事件有影響，最好交畀法律判決。如果廉署搵我作供，我一定盡公民責任，但暫時仲未有人搵我。」
其後祥仔又稱與陳志雲私下聯絡不多，他說：「希望大家畀啲空間佢，陳生係叻人，EQ又高，好多人對佢有正面評價，當然有人會唔鍾意佢，但佢嘅才華唔錯。」
葉翠翠去年7月曾與陳志雲出席澳門JCShopPremium新店開幕，她昨日說：「嗰次活動，錢銀嘅嘢我冇理，廉署暫時未有搵我。」又自爆數年前曾主動約陳志雲吃飯，她說：「佢畀咗好多工作上嘅意見我，學到好多嘢，好大得着。」
採訪：何慧斯
攝影：陳俊強