9月份係「張愛玲月」。為紀念張愛玲今個月90歲冥壽同埋逝世15周年，香港大學舉辦名叫《發現張愛玲》嘅公開展覽，展出張愛玲近年出版嘅作品，同埋一篇佢有份寫但從未發表過嘅英文小說《MyHongKongWife》。
張愛玲遺產執行人宋以朗話，呢篇英文小說大約喺1952至1955年寫成，得18頁，暫時係張愛玲唯一一篇同其他人合作寫嘅小說，亦都係唯一一篇用英文寫嘅喜劇小說，所以特別有價值。不過鑑於兩個作者都已經過身，要出版呢篇小說都有啲困難。
今明有人導賞
故事係講美國人Peter喺香港睇京劇時誤打誤撞認識咗一個花旦，即係小說嘅女主角，兩個人雞同鴨講但係真心相愛。佢哋結婚之後返美國居住，但係奶奶唔鍾意呢個新抱，仲嫌佢條旗袍個叉開得太高。Peter發現老婆生活得唔開心，於是介紹佢去教美國小朋友學中文，兼開埋班教唱京劇。故事去到最尾，Peter喺美國為老婆搞咗場京劇，老婆踏上舞台時，好似時光倒流咁，返番去同Peter初相識嗰時一樣……嘩，好浪漫呀！
市民想聽呢個喜劇故事嘅完整版本，就要趁今日同埋聽日，下晝2點或者5點半，去到中環堅道99號J舖葵里畫廊（近中環行人電梯），參加宋以朗嘅導賞環節。提提大家，聽日2點嗰場係英語導賞。