今年嘅東京遊戲展（TGS）剛剛在在日本幕張舉行，除咗可以預覽到來年新Games大作外，今年仲有個特色，就係好多遊戲都玩3D效果，部份更加入體感嘅玩法。去到Playstation展位，最多人爭住試首推3D版《GT5》，另外仲有結合3D同Move嘅《肉彈》，3D加體感嘅玩法，定必成為遊戲界潮流。
記者、攝影：許福合
《GT5》3D版 試玩等足半粒鐘
每年嘅TGS例必一試嘅《GT》系列，最新作《GT5》，今年亦係重點之一，同樣係放個試玩車架，不過今年又有個例外，就係會場放埋3D版本畀機迷試玩，不過好明顯，即使要戴埋眼鏡去玩，機迷對於3D版仍然比較有興趣，3D同2D版各預備咗5個試玩車架，不過機迷都係湧到3D一邊等試，2D就冷清好多，機迷最少要等15-30分鐘先玩到！
這次TGS展出嘅《GT5》，比以往展出嘅Demo版都更接近正式版，賽道同跑車已經有好多款式，不過可惜仲未見到最近公佈嘅小型賽車可以揀，而最令Fans們放心係推出日期終於落實，會在11月3日推出。筆者試玩過3D版《GT5》，覺得當使用第一身視點比賽時，立體效果最強，尤其係與前車追逐之時，更容易睇到前後景深嘅效果。雖然玩得耐仍然有眼花嘅感覺，但無可否認3D配賽車遊戲絕對能增加可玩性，《GT5》值得期待！
機迷意見
搵靚女
3D遊戲
《肉彈》左右勾拳
此《肉彈》與大家印象中不同，係一款使用2組Move控制器玩嘅遊戲，玩家可以直接揮動拳頭，左右勾拳打擊對手，同時可提供3D效果，就好似有個人站在面前一樣，勁真實！
《EyePet》養猴子
喜愛飼養小動物嘅玩家最啱玩，遊戲中會養一隻小猴子，動用Move控制器可以同佢玩、冲凉及餵食等，更可以幫佢扮靚，加埋可以用3D玩，更加似真。
《KillZone3》多款近身系統
《KillZone3》同樣係一款使用Move及有3D效果嘅遊戲，故事與前作會有關連，使用3D電視，3D效果會更強，最正係有多款近身戰鬥系統同武器，玩落有好多變化。
別注新色
雙色PSP
除遊戲外，PSP亦有新色推出，更係雙色系，分別有紅黑及藍白兩款，我就覺得藍白襯得幾好睇。另外，白色PS3亦會加多個320GB版，仲未買PS3的話就要留意喇。
