醫管局老外行政總裁蘇利文辭職，遴選新總裁跑馬仔踏入白熱化階段，主席胡定旭噚日透露，獵頭公司提供500個合資格嘅人畀佢哋揀，（點解呢份工咁易做？）今個星期二同四個較為出色候選人面試，外國人同本地薑各有兩個。
梁栢賢 張偉麟叮噹馬頭
肥胡稱面試後兩個本地薑表現較佳彈出，下月初要再接受面試。雖然佢唔肯講最後兩強是誰，但圈內人所共知，分別係醫管局質素及安全總監梁栢賢同聯網服務總監張偉麟。肥胡形容兩個候選人實力叮噹馬頭，要揀出真命天子有難度，希望第二輪面試後有定案，否則要搞第三輪面試。
遴選咁奄尖，肥胡笑言幾似揀老婆，鬼叫蘇利民珠玉在前咩。八方理解肥胡心態，正所謂千帆過盡皆不是，除卻巫山不是雲，有得揀，先至係老闆嘛。兩大熱門各有優劣，梁栢賢同前線員工關係好，可是中途出家入醫管局，稍缺行政經驗；張偉麟由低做起，由急症醫生一路打木人巷出頭，不過同前線員工關係一般。八方聽聞獵頭公司仲做緊嘢，因此唔排除殺出程咬金，兩人最終可能只係陪跑分子。