民間電台爭取開放大氣電波，不知不覺已經五年，下月初舉行開台五周年晚宴，台長阿牛透露，陳日君樞機原本答應到賀，可惜撞啱梵蒂岡有封聖儀式，樞機要離港，惟有被迫甩底，不過破天荒寫咗兩幅墨寶義賣，為民間電台籌款。阿牛話樞機墨寶未有底價，佢指特首煲呔身為虔誠天主教徒，今次應該把握機會買下「行公義好憐憫」墨寶，至於另一幅「寧鳴而死不默而生」，阿牛形容係民間電台抗爭座右銘。正在養病嘅支聯會主席華叔亦捐出墨寶，更答應阿牛當日現身撐場。民間電台唔會直播晚宴，費事廣管局又玩嘢掃場，連累賓客。