保安局局長李少光噚日開始放假四日外遊，朝早10點左右坐車牌AM5座駕去機場，喺沙田俾切線貨櫃車碰撞，好彩有驚無險，李少光冇受傷，匆匆截的士趕去機場。
根據警方資料，意外喺早上10點26分發生，不過警方事隔49分鐘，至11點15分先發出新聞稿通知傳媒，遠低於警方承諾20分鐘通報傳媒嘅標準，八方希望李少光放完假，會認真睇睇呢個問題。
肇事貨櫃車司機姓張，佢話當時拖住個20呎櫃，喺沙田卸貨後沿青沙公路出九龍，駛到大圍近沙田嶺隧道時出事；佢承認收掣唔切，撞倒AM5右邊倒後鏡，局長座駕右邊車門至車尾被劃花一條約4呎長花痕。