與資深財經版記者飯敍，論及家好多新入職小記真係爭唔落，一係就唔問，一問就問埋啲愚蠢問題。唔問問題，應該係擔心俾人覺得自己愚蠢，照咁睇，肯問已經好難得。有時甚至會見到攝影師早已到記招現場，小記卻姍姍來遲；無計，記者人工低已經唔係今日至有嘅事，做港聞少啲熱誠都好難做得投入，做財經記者少啲對金融市場嘅興趣就更隨時變成一份苦差。
最近就聽聞在菲律賓人質事件中有記者當見到死者家屬一刻竟問人家「家心情覺得點？」對方真係無言以對，聽聞唔少識呢位仁兄嘅行家聽到都即時打個突。財經版就更加多得意嘢，例如記招輪流發問，有小記竟然可以翻問一條剛剛已經被問過嘅問題，真係人問佢就瞓、瞓醒佢就問！有時只要參考資深嘅行家點樣發問，日積月累或多或少都偷到師啦。有啲做得好少少嘅記者，就索性走入市場搵真銀。
另一邊廂，投資大戶群亦唔見得好好多，近年唔少大銀行及投行積極為富二代提供財富管理課程，實質係為佢哋將來接手家族生意甚至家族財富完成銀行最關注嘅傳承（successionplan）大業，唔早啲箍住呢班大帝，將來點繼續搶生意。
新一代欠獨立思考
理財班有如洗腦班，一批又一批嘅新人類都被灌輸一套既定思考模式，就好似中學生為咗考試成功要一窩蜂個個畀錢出去補習攞貼士唔要蝕底咁。富二代三代個個遊艇會鄉村俱樂部一齊長大，唔係佢哋目空一切，係根本無機會睇見真正嘅世界。
家最令人擔心嘅情況就係，本地年輕人個個把口就話要點樣跳出框框，但係原來個個生於安樂，睇唔到有幾多會有破格思維，因為大家都活在一個既定模式裏面，欠缺獨立思考嘅能力，隨時就會變成容易被有心人利用作謀取利益的工具甚至被擺佈的棋子。
胡孟青
作者為獨立股評人