成班人食完午飯，走出雲咸街南華大廈，見到一架好經典嘅舊式白色勞斯萊斯一掠而過。當時啱啱交通燈由紅轉綠，呢架勞斯萊斯飛快左轉入皇后大道中，有型到極，轉彎時，睇到一個好好記嘅車牌，就係Dickson，不禁輕嘆一聲：「食有魚，出有車。大丈夫當如是也。」校友Ｃ咭一聲笑出嚟：「為孟嘗君市義乎。」
追數王目光銳利，立即講：「係唔係DicksonPoon架車呀？」鬼知咩，平時中環鬧市往往見到大型豪華車、跑車，目不暇給，從不留意車牌號碼，啲數字車牌除非好特別，唔容易記得嘅，但呢架白色房車嘅車牌就係Dickson，置地廣場就有間同名字嘅大寶號，當然係一見難忘。
現在時興自製車牌，於是市面上見到唔少古靈精怪嘅車牌，如果大名人真係以自己名字為車牌，例如Dickson，其目的為何？驚人地唔知乎？特登方便狗仔隊乎？追數王專家頭腦靈活，唔相信呢個車牌就係大名人嘅，佢話：「有三個可能性：（一）名人座駕車，（二）同名富豪座駕車，（三）係名人嘅decoy，引狗仔隊跟錯方向，名人其實坐喺另一架唔顯眼嘅車。我就相信係第三項，斷估名人都唔會故意暴露自己行蹤嘅啫。」
我地真係斷估，估錯唔會道歉，歡迎知情人士來電郵提供可信性高嘅答案，畢竟我地可能孤陋寡聞也。港紙跟隨美元疲弱，靚車越來越貴，我地呢啲只負擔得起日本車嘅人，呢排想話換車，見到日圓係咁升，無不牙痛咁聲。建築邦夫婦則剛去完大阪、神戶、和歌山返嚟，第一件事就係呻：「好貴，好貴。搭火車入和歌山，單程票要五千日圓，伸算港紙高達四百六十幾蚊。」日本人當一千円唔係錢，香港人就唔會隨便掉九十二蚊出去嘅啫。其實日本物價，以日圓計算，三十年來升得好慢，酒店房間租金基本上變動不大，但以前嘅每晚房租三萬円等於一千八百元，現在等於二千七百六十六，用港紙計就升咗53%，都幾係o架。記者Ｇ最鍾意去日本，年年都去一兩次，最近對左丁山講：「日圓咁強，我就快冇資格去日本自由行咯！」記者薪水升幅遠遠落後於日圓升幅，佢講得幾有可信性。