廉署又有人走，今次係「貪警剋星」社區關係處助理署長羅國忠。羅Sir80年加入執行處，長時間專責警察貪污案件，包括曾引起警廉衝突嘅冼錦華案，近年先調去社關處。53歲嘅佢決定提早退休唔續約，下星期三中秋就同老廉講再見。
廉署退休年齡去到60歲，呢幾年正值退休潮，原執行處處長（私人機構）李俊生啱啱先退休，首長李銘澤明年底亦屆退休年齡，之後又輪到另一處長黃世照。呢啲算係正常退休，但早排56歲嘅執行處原助理處長朱敏健都辭職，稍後過檔監警會，家連羅Sir亦提早退休，廉署難免面對青黃不接嘅考驗。
「木馬屠城」衝上馬檻
羅Sir同八方講，其實佢好唔捨得，亦好鍾意查案反貪，話晒喺廉署做咗30年6個月零19日。講到難忘案件，佢記得94年做過一單警務人員包庇馬檻嘅畸士，由於馬檻外好多馬伕把風，佢哋度咗招「木馬屠城」，廉署人員匿晒入架密斗車，一去到即刻跳落車再衝上樓拉人，為確保行動快狠準，佢哋仲借咗啟德附近個英軍軍營演練，由佢做指揮，結果成功破案。
廉署中人話，羅Sir除咗係貪警剋星，仲係廉署歌王，擅張學友腔，連王菀之都挑戰到，唔知羅Sir飲歌包唔包括《海闊天空》呢？