小賭王何猷龍檔新濠天地贊助嘅「水舞間」大型水上滙演，好多人都話想過大海睇睇，小賭王噚日仲隆重其事，邀請傳媒先賭為快，參與「水舞間」……個記者會！
海嘯無停工 望澳門體諒苦心
一向口才不俗嘅小賭王話，贊助「水舞間」，絕對係同佢哋啱晒嘴形，事關新濠天地都係充滿水嘅元素……如果華華無估錯，佢口中所謂水嘅元素，會唔會係客人輸畀佢嘅錢呢？
講講吓，小賭王又提到隔籬街威尼斯人搵法國馬戲團搞嗰壇ZAIA，佢話ZAIA無改個中文名，就已經係fundamentalmistake，仲一開始就主力sell太陽劇場（又錯喇！），而佢哋就唔會咁做，會主力sell「水舞間」，提高新濠天地嘅知名度……聽落，都幾「暗踩」對家喎。
講完對家，小賭王又再講番自己，佢話喺金融海嘯期間，佢哋係唯一一間無停工嘅賭場，所以佢希望澳門政府體諒佢哋呢番苦心同努力，第陣時畀多啲機會佢哋發展咁話。講到咁感人，澳門政府應該都收得好清楚啦！
講番噚日小賭王個記招，「水舞間」華華就睇唔到，咁惟有望實小賭王啦！點解？佢對襪囉，長到好似女人絲襪咁嘅款！
李華華
mailto:[email protected]