記協批評警方封鎖突發事件消息，疑似妨礙新聞自由，損害市民知情權，一哥鄧竟成噚日主持第一屆國際刑警資訊保安會議開幕禮，大批行家到場，想問一哥對此批評有乜解釋，往時佢都有幾句嘢講吓，噚日卻反常唔開口，唔回答記者問題，好傲慢。軍器廠街小道消息流傳，一哥對於記協日前嘅批評好唔滿意，呢種心情，八方可以理解，冇人鍾意被鬧，而且仲要負上影響新聞自由惡名，難怪一哥黑面；但話得說回來，如果警方唔係選擇性發放新聞消息，傳媒又點會有此批評呢？一哥噚日可能要主持儀式唔得閒，八方希望過兩日佢有時間解畫啦。