花旗國會中期選舉臨近，人民幣升值問題再度政治化，係近日人民幣急升嘅主要原因，選舉前人民幣升值課題無可避免仍會被炒作，但係選舉過後，人民幣料會回落。
前晚花旗股市微跌，內地股市噚日下跌超過1%，港股轉為窄幅波幅，恒指再升29點收市，成交雖略為縮減，仲有655億，可以個別炒作嘅股份都唔少，花旗股市回復升勢，港股會上試22000關。
永利C輪24601：永利澳門（1128）噚日報收14.12元，升3%。股價早幾日跌穿50日線，成交即刻增加，呢兩日以更大成交將股價推上10日線樓上，反映短線見底，料上試6月高位14.52元，破位睇16.30元，可以諗吓隻C輪24601。
隻輪現價18.4仙，2011年3月8日到期，行使價15元，溢價19.3%，引伸波幅55.8%，槓桿率7.7倍（有效4倍），正股升上16.30元，24601睇31.3仙，有7成升幅，正股跌穿13.20元就沽咗隻輪止蝕。
俊樺