國際刑警組織與香港警務處合辦第一屆資訊保安會議。國際刑警秘書長羅秉義致辭時爆料，話網絡犯罪分子真係好沙膽，竟然老虎頭上釘蝨乸，在facebook上冒佢個名開戶，冒牌國際刑警一哥要求29個成員國，交換國際逃犯資料。
如此公然挑戰執法部門，不法分子似乎係嫌日子過得太安樂，羅秉義稱國際刑警好快就識破網上騙局，追查後發現不法分子網絡強大，竟然橫跨32個國家，十分猖狂，結果各國警方同國際刑警聯手破案，分別喺32個國家拘捕130個膽大包天嘅網絡罪犯。
互聯網無國界，因此網上犯罪變成環球執法問題，作為國際刑警組織一哥，羅秉義話各地警方一定要緊密合作，而為免不法分子侵入各國保安系統，國際刑警透過全球加密警察通訊系統，仲有國際刑警電子身份聰明卡，188個國家嘅國際刑警人員，就可以喺世界任何角落安全通訊，唔會畀網絡犯罪分子渾水摸魚。