區選倒數一年，民協本周五舉行路向營，佢哋係基層黨，選擇北上東莞，因為貪平，兩日一夜食足四餐都係300幾蚊一位，好抵咁話。據講今次集思會，會討論是否要改變民協過去廿幾年「傾向社會主義」嘅黨綱，改以「混合經濟」為主調。前主席馮檢基拒評是否由左變右，只係話：「所謂混合經濟，即係唔會單純地排斥社會或自由市場主義，改為採納兩者中間路線。」
對於基哥上述句子，八方唔敢話聽得明，恐怕佢哋啲支持者都未必曉，總之繼續搞街坊旅行團、蛇宴就得啦，係咪？明年區選民協希望收復上屆失地，仲有個願望，希望日後可以派人參選特首。