內地廉價航空終於殺入香港，春秋航空噚日公佈開辦香港飛上海航線，採用可乘搭180人嘅A320空中巴士，9月28日首航，每日來回各有一班，香港飛上海浦東機場下午13:55，上海飛香港早上10:20。小妹覺得航班時間都一般啦，最緊要票價係咪好抵？
網購用繁體港幣計價
春秋航空發言人王先生笑笑口話，講到價錢平到你唔信，新開期間優惠機票單程只係$199，為期一個月至10月30日為止，「優惠機票總共有1,212張，先到先得」。消費者可以喺9月18日早上10點開始登上春秋航空網站 http://www.china-sss.com購買。
佢又提醒小妹，春秋航空網站分中文繁體、簡體同英文網站，推廣期間嘅$199優惠機票若登入中文繁體網購買以港幣199結算，簡體網用人民幣199計，英文網用199美金計，佢又話機票錢未包燃油附加費，航班亦唔會提供免費餐飲。
前民航處長樂鞏南話，$199香港飛上海真係史上最平，但係唔等於架機唔安全，因為民航處批得許可證，部機符合安全要求。
中旅社港澳營銷中心總經理吳熹安話，有興趣同廉航合作推出機票加酒店上海套票，較正常價可以平一半賣1,000蚊。
電郵：mailto:[email protected]