雷曼爆煲兩周年，苦主大聯盟逾百名成員噚日巡迴中環15間銀行、證監會同金管局抗議，要求百分百賠償。召集人陳浩偉批評港府同銀行處理雷曼賠償事件嘆慢板，有啲買咗雷曼相關產品ELN嘅散戶，則批評政府忽略佢哋苦況。
立法會調查雷曼專責小組開工一年多，初時議員為苦主討回公道不甘後人，爭相加入，但熱度過後，好似十個救火的少年咁逐個走，民主黨卿姐上個月退出。佢同八方講，由於已有甘乃威、涂謹申兩個黨友坐鎮，一個黨毋須三個議員做調查，所以退出，但仍會協助苦主。
小組成立時有27人，現時餘下廿個，八方聽聞有議員提出請銀行前線銷售人員出席作供，若果成事，相信有排查，堪稱史上最長壽調查。