唐唐「家臣」、工業界議員林大輝，噚日同傳媒茶敍時再次發功，評論一名與唐唐角逐特首嘅潛在對手時，只以「某君」稱呼該名疑似特首候選人，記者問佢「某君」係咪指梁振英，林大輝咁講：「好多人都有可能係某君，包括梁振英。」
林大輝話，近期出席唔少飲宴場合都見到「某君」，佢話覺得好出奇：「點解佢會咁得閒，乜活動都見到佢？」佢續稱，其實「某君」位高權重，平日就房屋問題發言時應該比一般人謹慎，否則搞到樓市大升大跌，就會好似八萬五咁害死唔少人。講到興起，林大輝話「某君」既然想參選應堂堂正正行出嚟，「藏頭露尾、畏首畏尾，正契弟」。