花旗股市繼續炒上，道指報收10544，升81點，睇個勢可以伺機上試10700，就算唔可以即刻破，後市應該可以企穩，年底前好大機會破11000關開展新一輪升浪。
港股食住前日個勢推高，恒指收報21696，升37點，向上嘅勢已經form咗。巴塞爾新例公佈之後，銀行股會係全球短線焦點，有能力維持原有派息比率甚至可提高派息比率嘅銀行，會係未來基金嘅寵兒。
工行C輪24607：工商銀行（1398）噚日報收5.93元，升1.5%。工行股價已經升番上所有短中長期平均線之上，連續兩日有大成交支持升勢，上破8月高位6.10元之後，料會向6.40元推進，可以諗吓隻C輪24607。
隻輪現價30仙，2011年3月2日到期，行使價6.38元，溢價12.7%，引伸波幅29.1%，槓桿率19.8倍（有效7.9倍），正股升上6.40元，24607睇52.2仙，升幅超過7成，正股跌穿5.73元就沽咗隻輪。
俊樺