人人想住大屋，但真係住到華人世界最大嘅屋，有喜亦有悲。「我家住在紫禁城」展覽聽日起至下月中喺太古坊ArtisTree舉行，以生動方式介紹故宮呢座好鬼莊嚴嘅建築。
籌辦展覽嘅趙廣超話，參觀紫禁城最應該留意係屋頂，因為中國人屋頂係世界最講究，而紫禁城係極致。屋頂上有脊獸，係防雨水嘅琉璃套，雕成動物模樣則有守護作用，例如獬豸（粵音：蟹治）原來係「測謊機」；傳說發現有人講大話會落嚟撞佢。
城內有一對叫「望君出」獸像，提醒君主要經常出外體察民情；另一對喺城外叫「望君歸」，叫出外嘅君主唔好掛住花天酒地，快啲回宮。妃嬪住喺皇帝隔籬，唔得寵住遠少少，雖然路程少於10分鐘，但深宮規矩多，不能自由行動，真係這麼近那麼遠。