政改一役，北京最後關頭接納民主黨個區議會方案，成個局好似唔同晒，有啲人覺得民主黨驟變建制派同路人；雖然佢哋唔係咁睇，不過建制派中人，似乎已經對呢班「反中亂港」、「逢中必反」嘅分子另眼相看，即使仍然各自修行，但至少可以同枱食飯。
充滿象徵意義
民主黨10月8日舉行創黨16周年酒會及晚宴，以前反對黨黨慶，好少商界、左派到賀，但今時唔同往日，八方收到風，全國政協常委陳永棋率先買咗一圍枱。唔少民主黨人知道肥棋落柯打買枱都嘖嘖稱奇，有資深黨員稱，印象中多年來肥棋同民主黨都冇乜交往，以佢紅色商人背景都出面賀民主黨，充滿建制派希望同民主黨維持良好關係嘅象徵意義。
不過更令人意外嘅係四叔李兆基都對民主黨釋出善意，據講四叔旗下恒基地產亦買咗一圍枱。其實四叔另一上市公司煤氣，幾乎年年都有買枱賀民主黨，但用恒地名義應該係第一次，原因為何，八方不多揣測，卻記得李永達喺天匯事件中狂插恒地，質疑有人跳層、造市、托價，迫使差佬開快勞做嘢，四叔俾民主黨搞到一鑊泡，都真金白銀買枱賀壽，呢杯和頭酒，應該幾啃。
四叔咁畀面，唔知民主黨使唔使投其所好，參考跳層做法「跳枱」，唔要第4、14、24等枱號，跳到第68號枱？知情人士同八方講，其實歷年來民主黨黨慶宴會，個別華資大地產商都有畀面買枱，但通常唔會自己出面，多數係透過旗下物業管理公司埋單，一為神功，二為弟子，趁機拉攏吓關係，一旦要同區議員交手時都有偈傾咁話。
跟紅頂白者眾
民主黨今年黨慶在尖沙嘴大劉新場TheONE煌府舉行，筵開40席，明碼實價鑽石席2萬元一圍，黃金席1.2萬元一圍。呢個世界跟紅頂白者眾，既然左佬、富商都畀面，八方聽聞銷情唔錯，已賣咗十幾張枱，餘下都幾搶手。有幾個局長已應承當晚到場，中聯辦、外交部駐港特派員公署、駐港部隊就未有回覆。
mailto:[email protected]