搞骨灰龕嘅上市公司問博唔只想喺陰宅市場分一杯羮，佢舊年仲做埋台灣新派紙紮產品生產商SKEA（IKEA嘅變奏）香港獨家代理，用新潮玩意搶攻紙紮市場，上個月率先引入外形同iPhone4幾乎一樣嘅紙紮sPhone4，而且係陽間仍未有售嘅白色版，真正唔死冇得用。
最快年底出街嘅白色iPhone4，聞說炒到30,000蚊一部，陰間紙紮版亦唔便宜，每套盛惠945蚊，係港元，唔係冥通銀行鬼鈔，由台灣寄嚟香港嘅運費買家自付，陽間燒落陰間費用自理。
iPad變sPad
除咗sPhone4，問博仲有賣埋連蘋果都冇出嘅白色sPad，外形同iPad似到十足十，不過呢部潮物同sPhone4一樣，原裝嗰個蘋果logo，變咗做個黑白乾坤，唔連運費，sPad每個賣315蚊。問博話上述兩款紙紮潮物相當受歡迎，買家以中環上班族為主，sPad更係連陳列品都有人買。唔知sPhone4用邊個網絡先可以陰陽互通？係4抑或數冥通？