前港隊領隊羅傑承質疑港亞運隊下個月走去高雄同中華台北、菲律賓及澳門3隊亞洲魚腩踢邀請賽，引來球圈熱烈討論，搞到羅生連環出blog回應，仲問足總點解唔約卡塔爾、印度同印尼等有職業聯賽嘅國家隊友賽熱身，原來呢件事仲有下文。
約卡塔爾亞運隊或鬥兩「印」
我求大俠噚日睇到足總最新代表隊嘅暫定國際賽賽程，原來港亞運隊去高雄食魚腩外，其實亦約咗卡塔爾亞運隊11月初喺主場打番場友誼波，但因為要確定兩隊唔會喺亞運足球同組先可落實，所以冇特別提呢場波。
大港腳都有唔少任務，除已簽約11月中主場友賽巴拉圭場大波外，下個月初亦準備作客對印度同印尼，只喺呢兩場波仲有啲細節未落實，所以唔公佈得住啫。最近多咗好多白頭髮嘅港隊教練曾sir話，已積極約緊下半季嘅友賽，希望喺2014世盃外圍賽前攞多啲分，目標上番亞洲20名內，咁港隊先可以唔使踢世盃預賽。