如果讀者同我求大俠一樣有番咁上下年紀，一定有睇過日漫《男兒當入樽》，當年仲掀起香港一股籃球潮㖭。記得書中有段好鬼熱血，帶領主角櫻木花道、流川楓嘅湘北高中教練安西，喺大戰陵南前夕突然暈咗要住醫院，不過湘北眾將冇因為咁而偷懶，反而眾志成城擊敗陵南打入全國賽㖭！
估唔到呢啲橋段，竟然都喺現實生活出現。話說史篤城周一晚英超主場對阿士東維拉，賽前領隊普利斯突然收到通知，母親大人不幸過身，佢就趕返南威爾斯老家，由助教甘普暫時領軍。
教頭丁母憂半場趕返
上半場維拉就靠達寧門前頭槌建功，以1:0領先；半場休息期間，熱血嘅場面終於出現，普利斯飛奔返回球場督師，球隊上下都好感動，結果80分鐘堅韋尼鍾斯頭槌建功，幫史篤城追平，補時階段，賀夫門前混戰中射入，為主隊反勝2:1，贏得今季首場勝仗，普利斯媽咪在天之靈，相信都老懷安慰。
史篤城助教甘普事後講：「對普利斯嚟講，今次係悲劇，不過佢好值得尊敬；由老家返球場期間，已不斷打電話過我指揮球隊；下半場佢出現，對球員同球迷有好大鼓勵作用，佢真係一個偉大領隊。」睇到呢度，我求大俠都眼濕濕！
周一主隊好有運
講開又講，周一幾支主隊都算執番身彩，史篤城補時擊敗維拉，西甲嘅艾美利亞同德乙嘅科特布斯都喺落後之下，追平皇蘇同卡爾斯魯厄。當中兩度落後嘅艾美利亞去到補時階段，先由後備入替嘅阿根廷前鋒烏路亞射入成2:2完場。科特布斯仲好彩，66分鐘前仲輸緊2:5，但表現潛水耐到連我求大俠幾乎唔記得佢個名嘅前中國國腳邵佳一嘅兩個罰球，一球離門30米直入；一球畀門將擋出隊友補中，士氣返晒嚟嘅科特布斯最終逼和5:5，爆咗個250倍嘅「和其他」波膽！