菲律賓人質慘案當日，全港市民透過電視螢光幕全程直擊慘劇，震撼全城。港大喺案發後兩星期進行一項民調發現，市民認為香港新聞傳媒報道負責任嘅比率，急升9個百分點，達到41個百分點。至於認為傳媒不負責任嘅，就大跌12個百分點，只有17個百分點，相信係市民對香港傳媒緊貼報道事件嘅感受。
其實今次傳媒報道菲律賓慘案時，除咗有現場採訪攝記中流彈受輕傷，更有行家情緒受困擾，所以呢次採訪絕對唔單止「負責任」，更加係負傷上陣。
至於香港新聞傳媒整體公信力方面，調查發現升咗0.36分，達到6.53分，係舊年4月有紀錄以來新高。調查又發現，認為香港新聞傳媒有充份發揮言論自由嘅受訪者比率，較上次調查升咗兩個百分點，達到73%。