可換鏡嘅DC越嚟越多人用，Samsung半年前推出首部無反光鏡可換鏡頭式數碼相機NX10，話咁快家又推出第二代NX100，噚日三星社長朴商鎮仲飛嚟香港，舉行全球首個NX100發佈會，睇嚟好重視香港巿場。朴商鎮好有信心話，全球今年全年可以賣出150萬部NX相機喎。
首創i-Function鏡頭
Samsung消費電子業務總監鍾孝揚(Alex)話，NX100集DC同DSLR所長，輕身得嚟又可以換鏡頭，仲拍到高質素照片，入門同專業拍友都啱用，「呢類新品種相機好受港人歡迎，全港巿場今年銷量比舊年急升八倍」。
NX100備有超高清3吋Amoled螢幕，達到1,460萬像素，最大賣點首創i-Function鏡頭，用家舉機影相嗰陣，單手按動鏡頭嘅i-Function按鍵，就可以改變各種拍攝設定，極速調校快門、光圈、感光度，「有咗呢個功能，拍友唔會miss一個鏡頭。」Alex話，新機備有黑、白、棕、銀色四色選擇，啱晒潮人。不過可能為咗收身，部機放棄咗第一代有嘅內置閃燈同電子觀景窗。
名模樂基兒噚日都嚟撐場，佢自認影相初哥，試玩過NX100都幾易用，最like部機嘅智能濾光鏡，可以做出多種效果。新機配20至50mm變焦鏡頭連閃光燈套裝賣$5,290。
電郵：mailto:[email protected]