每年9月係全國嘅「品質月」，各大企業均積極開展品質月活動，透過分析事故案例，加強品質教育，以提高對品質水準關注意識，江西省甚至發動全省月餅品質監督抽查。今年「品質月」由市委宣傳部、市質監局、市工商局等9個部門聯合主辦，主題係「抓品質水準提升，促發展方式轉變」。
唔知係咪越高調話畀全世界知你重視品質，出現品質危機事件就更惹人注目，正如奧運前後爆出嘅三聚氰胺毒奶粉，到今天仍未完全解決，反映中國人最醜陋一面。
「品質月」期間，各區縣質監同工商部門每個周末會聯合搞活動，內容包括現場受理投訴舉報，免費為市民進行產品檢測同真假鑑定等。仲標榜消費者買到問題商品，唔理係生產定銷售環節出事，都可以現場解決，而舉報一經查實，可獲2000至5萬元人民幣重賞。
金九銀十市民最關心嘅除咗食落肚嘅月餅，更有冚上身嘅棉被，仲有公租房、下鄉產品品質等問題，都備受關注。
國貨品質有待改進
咁，有國家保證嘅企業又點呢？獲國家質檢總局授予「國家品質管理卓越企業」嘅雙滙集團，就因品質問題遭消費者投訴。喺百度輸入「雙滙品質問題」幾隻字，即時出現40萬個相關網頁，據稱喺佢嘅火腿腸發現鐵絲、頭髮、螺絲釘、車票、膠袋等異物。
已停牌5個月嘅雙滙發展（000895.SZ），正等待資產重組，由於阿媽注資畀阿仔嘅資產作價，機構投資者有極大分歧，所以遲遲未完成，唔怪得機構想買同類股都要跑嚟買雨潤食品（1068）。雙滙現時流通股東中有117隻基金，持股佔流通股67.33%，最著名嘅外資股東要數鼎暉同高盛嘅合營。管理層同外資股東現呈膠着局面，似乎又係另一宗怨氣極重嘅外資投資中國企業個案。
胡孟青
作者為獨立股評人